shāmil tū mire jism maiñ sāñsoñ kī tarah hai

ye yaad bhī sūkhe hue phūloñ kī tarah hai

dil jis kā nahīñ harf-e-mohabbat se shanāsā

vo zindagī vīrān mazāroñ kī tarah hai

fitrat meñ hai daulat ke khilaunoñ se bahalnā

ik dost mirā shahr meñ bachchoñ kī tarah hai

har raat charāġhāñ sā rahā kartā hai ghar meñ

ik zaḳhm mire dil meñ sitāroñ kī tarah hai

mat kholiyo mujh par kabhī ehsāñ ke darīche

ġhairat mujhe pyārī tirī yādoñ kī tarah hai

patthar sadā zillat ke ta.āqub meñ raheñge

kotāhī-e-guftār gunāhoñ kī tarah hai