mere har ek saañs meñ shirkat hai aah kī

khaa.e hue huuñ choT tumhārī nigāh kī

kyā ruḳh badal badal ke mujh āshufta-hāl par

parchhā.iyāñ paḌīñ tirī zulf-e-siyāh kī

baḌhtī ga.ī gunāh kī lazzat gunāh meñ

paḌtī ga.ī gunāh se aadat gunāh kī

sab kuchh nibāhnā hai bahut sahl āj-kal

ya.anī nibāh shart nahīñ hai nibāh kī

anjām āshkār hai mujh ġham-nasīb kā

lī hai panāh tere ġham-e-be-panāh kī