na vāpsī hai jahāñ se vahāñ haiñ sab ke sab
zamīñ pe rah ke zamīñ par kahāñ haiñ sab ke sab
koī bhī ab to kisī ke muḳhālifat meñ nahīñ
ab ek dūsre ke rāzdāñ haiñ sab ke sab
qadam qadam pe añdhere savāl karte haiñ
ye kaise nuur kā tarz-e-bayāñ haiñ sab ke sab
vo bolte haiñ magar bat rakh nahīñ paate
zabān rakhte hai par be-zabāñ haiñ sab ke sab
suī ke girne kī aahaT se guuñj uThte haiñ
giraft-e-khauf meñ ḳhālī makāñ haiñ sab ke sab
jhukā.e sar jo khaḌe haiñ ḳhilāf zulmoñ ke
lagā hai aisā 'dvij' be-zabāñ haiñ sab ke sab