masīh-e-vaqt bhī dekhe hai dīda-e-nam se
ye kaisā zaḳhm hai yaaro ḳhafā hai marham se
koī ḳhayāl koī yaad koī to ehsās
milā de aaj zarā aa ke ham ko ḳhud ham se
hamārā jām-e-sifālīñ hī phir ġhanīmat thā
milī sharāb bhalā kis ko sāġhar-e-jam se
havā bhī tez hai yūrish bhī hai añdheroñ kī
jalā.e mish.aleñ baiThe haiñ log barham se
ġhamoñ kī aañch meñ tap kar hī fan nikhartā hai
ye sham.a jaltī hai 'jāved' chashm-e-pur-nam se