ham din ke payāmī haiñ magar kushta-e-shab haiñ

is haal meñ bhī raunaq-e-ālam kā sabab haiñ

zāhir meñ ham insān haiñ miTTī ke khilaune

bātin meñ magar tund anāsir kā ġhazab haiñ

haiñ halqa-e-zanjīr kā ham ḳhanda-e-jāved

zindāñ meñ basā.e hue ik shahr-e-tarab haiñ

chaTkī huī ye husn-e-gurezāñ kī kalī hai

yā shiddat-e-jazbāt se khulte hue lab haiñ

āġhosh meñ mahkoge dikhā.ī nahīñ doge

tum nik.hat-e-gulzār ho ham parda-e-shab haiñ