ehsās meñ phuul khil rahe haiñ
patjhaḌ ke ajiib silsile haiñ
kuchh itnī shadīd tīrgī hai
āñkhoñ meñ sitāre tairte haiñ
dekheñ to havā jamī huī hai
socheñ to daraḳht jhūmte haiñ
suqrāt ne zahr pī liyā thā
ham ne jiine ke dukh sahe haiñ
ham tujh se bigaḌ ke jab bhī uThe
phir tere huzūr aa ga.e haiñ
ham aks haiñ ek dūsre kā
chehre ye nahīñ haiñ aa.ine haiñ
lamhoñ kā ġhubār chhā rahā hai
yādoñ ke charāġh jal rahe haiñ
sūraj ne ghane sanobaroñ meñ
jaale se shuāoñ ke bune haiñ
yaksāñ haiñ firāq-o-vasl donoñ
ye marhale ek se kaḌe haiñ
pā kar bhī to niiñd uḌ ga.ī thī
kho kar bhī to rat-jage mile haiñ
jo din tirī yaad meñ kaTe the
maazī ke khañDar bane khaḌe haiñ
jab terā jamāl DhūñDte the
ab terā ḳhayāl DhūñDte haiñ
ham dil ke gudāz se haiñ majbūr
jab ḳhush bhī hue to ro.e haiñ
ham zinda haiñ ai firāq kī raat
pyārī tire baal kyuuñ khule haiñ