mirī rañgīñ-kalāmī kā hai vo gul pairahan baa.is

ki hove bulbuloñ kī ḳhush-safīrī kā chaman baa.is

koī hotā hai sañg-e-sīna ḳhusrav se raqīboñ kā

huā nāhaq halāk apne kā aapī kohkan baa.is

jo hotā hai kisī se uns sab se vahshat aatī hai

mirī sahrā-nashīnī kā hai merā man-haran baa.is

'hazīñ' un sho.ala-ruḳhsāroñ se jī ko mat lagā hargiz

huī āḳhir ko parvāne ke jalne kī lagan baa.is