haqīqat se jo āshnā ho gayā
quyūd-e-havas se rihā ho gayā
nuqūsh-e-amal ko miTā kar koī
amīr-e-tilism-e-duā ho gayā
vo qaid-e-tasavvur se āzād hai
latāfat kā jo aa.ina ho gayā
tahī-dāmanī se pashemāñ the ham
vo tar-dāmanī par ḳhafā ho gayā
hai chehroñ pe kyuuñ chhā.ī pazhmurdagī
shagufta diloñ ko ye kyā ho gayā
jo ḳhud ḳhāliq-e-mudda.ā thā kabhī
vahī banda-e-mudda.ā ho gayā
'vafā' mai-kade ab na jaa.e koī
vo riñd-e-azal pārsā ho gayā