jise mileñ vahī tanhā dikhā.ī detā hai

hisār-e-zāt meñ simTā dikhā.ī detā hai

kisī ke sar pe koī sā.ebāñ nahīñ har shaḳhs

ḳhud apnī chhāñv meñ baiThā dikhā.ī detā hai

vo daur-e-tesha-girī hai ki aadmī kā vajūd

har ek samt se TuuTā dikhā.ī detā hai

sazā-e-dār abhī tak hai ahl-e-haq ke liye

abhī salīb pe iisā dikhā.ī detā hai

dhuāñ dhuāñ hai fazā ātish-e-ta.assub se

nagar nagar mujhe jaltā dikhā.ī detā hai

ye kaifiyat hai junūñ kī yā dil kī vīrānī

ki apnā ghar mujhe sahrā dikhā.ī detā hai

bhaTak rahī hai kisī karbalā meñ 'soz' kī ruuh

kuchh is tarah se vo pyāsā dikhā.ī detā hai