shaḳhsiyat us ne chamak-dār banā rakkhī hai

zehniyat kyā kaheñ bīmār banā rakkhī hai

is qadar bhiiḌ ki dushvār hai chalnā sab kā

aur ik vo hai ki raftār banā rakkhī hai

ek mushkil ho to āsān banā lī jaa.e

us ne to zindagī dushvār banā rakkhī hai

paas aa jaatā hai maiñ duur chalā jā.ūñ to

us ne duurī bhī lagātār banā rakkhī hai

zehn aur dil meñ jo an-ban hai vo an-ban na rahe

is liye darmiyāñ dīvār banā rakkhī hai

shaḳhs kaisā hai vo kyā hai nahīñ ma.alūm hameñ

shahr meñ us ne magar dhaar banā rakkhī hai