baḌhā do dard kī lau aur kam hai mere liye
abhī ye ishq meñ pahlā qadam hai mere liye
jahāñ jahāñ se haiñ vābasta ḳhvāb logoñ ke
vo har maqām bahut mohtaram hai mere liye
miTāte jāoge tum darj karte jā.eñge ham
tumhāre vāste ḳhanjar qalam hai mere liye
har ek lamha tirī justujū meñ ḳharch huā
mujhe ye lagtā thā merā janam hai mere liye
maiñ apnī raah kī ḳhud raushnī banūñ to banūñ
koī ḳhudā hai na koī sanam hai mere liye