maiñ ne maanā ek na ik din lauT ke tū aa jā.egā
lekin tujh bin umr jo guzrī kaun use lauTā.egā
hijr ke sadme us kā taġhāful bāteñ haiñ sab kahne kī
kuchh bhī na mujh ko yaad rahegā jab vo gale lag jā.egā
ḳhvāb-e-vafā āñkhoñ meñ basā.e phirtā hai kyā dīvāne
ta.abīreñ pathrāv kareñgī jab tū ḳhvāb sunā.egā
kitnī yādeñ kitne qisse naqsh haiñ in dīvāroñ par
chalte chalte dekh leñ muḌ kar kaun yahāñ phir aa.egā
bād-e-bahārī itnā batā de sāda-dilān-e-mausam ko
sarf-e-chaman jo ḳhuun huā hai rañg vo kab tak lā.egā