muḳhtasar sī vo mulāqāt bahut achchhī thī

chand lafzoñ meñ Dhalī baat bahut achchhī thī

lamha lamha kisī ummīd pe jab guzrā thā

din bahut ḳhuub thā vo raat bahut achchhī thī

be-qarārī hī meñ jab dil ko qarār aatā thā

haa.e vo shiddat-e-jazbāt bahut achchhī thī

husn ke rañg the har pahlū numāyāñ jis meñ

apnī tasvīr-e-ḳhayālāt bahut achchhī thī

āñkheñ bhar aa.ī thiiñ milte yā bichhaḌte un se

donoñ vaqtoñ kī vo barsāt bahut achchhī thī

chāhnā bhī unheñ aur muñh se na kuchh bhī kahnā

dil kī ḳhāmosh munājāt bahut achchhī thī

lab pe aa jaatī to kuchh aur bhī achchhā thā 'rishī'

aap ke dil meñ jo thī baat bahut achchhī thī