shab-e-ġham yaad un kī aa rahī hai

charāġh-e-dil kī lau tharrā rahī hai

bayān-e-dost nāseh kī zabāñ se

tabī.at aur machlī jā rahī hai

kahāñ naqsh-e-kaf-e-pā DhūñDte ho

sadā-e-pā to dil se aa rahī hai

baḌe dil-kash haiñ duniyā ke ḳham o pech

nazar meñ zulf sī lahrā rahī hai

huī muddat ki dil ātish-zada thā

fuġhāñ se aaj tak aañch aa rahī hai

shab-e-va.ada ḳhayāloñ ke ufuq par

gurezāñ sī ziyā tharrā rahī hai

mohabbat ko kahāñ tāb-e-nazāra

javānī aap hī sharmā rahī hai

sukūt-e-shām kī pahnā.iyoñ se

sadā us ajnabī kī aa rahī hai