har lamha thā sau saal kā Taltā bhī to kaise

le aa.ī shab-e-ġham koī martā bhī to kaise

ik aag thī jo phūñk rahī thī do-jahāñ ko

vo dil se mire ho ke guzartā bhī to kaise

ham pyaas ke māroñ ne abas aas lagā.ī

barsā huā bādal thā barastā bhī to kaise

gulchīñ kī nazar taak meñ rahtī thī barābar

ġhuncha koī khiltā bhī mahaktā bhī to kaise

tinke kī rukāvaT bhī na thī ġhaar kī tah meñ

phir phailā huā paañv sambhaltā bhī to kaise

saaya na koī naqsh-e-qadam kūcha na bāzār

sahrā ke safar meñ thā bhaTaktā bhī to kaise

siine meñ koī sho.ala na nazroñ meñ kahīñ barq

'shohrat' bhalā dil merā bahaltā bhī to kaise