ye kahāñ lagī ye kahāñ lagī jo qafas se shor-e-fuġhāñ uThā
jale āshiyāne kuchh is tarah ki har ek dil se dhuāñ uThā
lagī aag mere jigar meñ yuuñ na lage kisī ke bhī ghar meñ yuuñ
na to lau uThī na chamak huī na sharar uḌe na dhuāñ uThā
koī mast-e-mai-kada aa gayā mai-e-be-ḳhudī vo pilā gayā
na sadā-e-naġhma-e-dair uThī na haram se shor-e-azāñ uThā
ga.e saath shaiḳh-e-haram ke ham na koī milā na liye qadam
na to ḳhum baḌhā na subū jhukā jo uThā to pīr-e-muġhāñ uThā
lab-e-ḳhum se nikle sadā-e-qum sar-e-dosh aise hazār ḳham
ḳham-e-āsmāñ bhī ho jis meñ gum vo siyāh abr kahāñ uThā
tujhe mai-e-farosh ḳhabar bhī hai ki maqām kaun hai kyā hai shai
ye rah-e-haram meñ dukān-e-mai tū yahāñ se apnī dukāñ uThā
ye saped-rīsh 'riyāz' hai jo banā hai bazm meñ pand-go
ise kyuuñ na abr-e-siyah kahūñ ki baras paḌā ye jahāñ uThā