thī zarf-e-vazū meñ koī shai pī ga.e kyā aap
ai shaiḳh yahāñ kaun hai maiñ chuur huuñ yā aap
dīvānoñ ke sar ho ga.ī kiyā zulf-e-dotā aap
vo jā ke gale apne lagā laa.e bulā aap
hans hans ke mujhe aap abas kos rahe haiñ
ro ro ke mire vāste māñgeñge duā aap
uḌte bhī agar ham to qafas le ke na uḌte
sayyād qafas sū-e-chaman uḌ ke chalā aap
jo uTh nahīñ sakte the ga.e uTh ke lahad meñ
baiThe raheñ ab ghar meñ liye uzr-e-hinā aap
jaate nahīñ ham mast kabhī uTh ke haram se
aatī hai yahāñ uḌ ke mai-e-hosh-rubā aap
kyuuñ phir ga.iiñ kambaḳht kī āñkheñ dam-e-āḳhir
rakhte the bahut ġhair se ummīd-e-vafā aap
āvāz mirī baiThī hai ai hazrat-e-zāhid
kyuuñ bahr-e-azāñ aaj dabāte haiñ galā aap
halkā sā ġhilāf ek thā sayyād qafas par
thī aur na kuchh rok rukī mujh se sabā aap
qaabū kā tumhāre bhī nahīñ josh-e-javānī
be-chheḌe hue TūTte haiñ band-e-qabā aap
mohtāt 'riyāz' aap javānī meñ bahut haiñ
piirī meñ bhī lūTeñge javānī kā mazā aap