aks par yuuñ aañkh Daalī jā.egī
sāmne kī choT ḳhālī jā.egī
ye qayāmat bhī nikālī jā.egī
us galī se khā ke gaalī jā.egī
ka.abe meñ botal khule mauqa kahāñ
zamzamī se aaj Dhālī jā.egī
gul to kyā haiñ tā-qafas ai bād-e-tund
patta patta Daalī Daalī jā.egī
bazm-e-sāqī meñ agar laġhzish huī
haath se mai kī pyālī jā.egī
gudgudāne ko kaf-e-pā dil ke saath
ārzū-e-pā.emālī jā.egī
vā dar-e-tauba hai to jaldī hai kyā
baat bigḌī kuchh banā lī jā.egī
murda koī aarzū is dil meñ hai
kah ga.e vo jaan Daalī jā.egī
mai-kade ham ghar se jā.eñge 'riyāz'
ek botal saath ḳhālī jā.egī