shab-e-vasl thī chāñdnī kā samāñ thā

baġhal meñ sanam thā ḳhudā mehrbāñ thā

mubārak shab-e-qadr se bhī vo shab thī

sahar tak mah o mushtarī kā qirāñ thā

vo shab thī ki thī raushnī jis meñ din kī

zamīñ par se ik nuur tā āsmāñ thā

nikāle the do chāñd us ne muqābil

vo shab sub.h-e-jannat kā jis par gumāñ thā

urūsī kī shab kī halāvat thī hāsil

far.h-nāk thī ruuh dil shādmāñ thā

mushāhid jamāl-e-parī kī thī āñkheñ

makān-e-visāl ik tilismī makāñ thā

huzūrī nigāhoñ ko dīdār se thī

khulā thā vo parda ki jo darmiyāñ thā

kiyā thā use bosa-bāzī ne paidā

kamar kī tarah se jo ġhā.eb dahāñ thā

haqīqat dikhātā thā ishq-e-majāzī

nihāñ jis ko samjhe hue the ayaañ thā

bayāñ ḳhvāb kī tarah jo kar rahā hai

ye qissa hai jab kā ki 'ātish' javāñ thā