roz-e-maulūd se saath apne huā ġham paidā
lāla-sāñ daaġh uThāne ko hue ham paidā
huuñ maiñ vo naḳhl ki har shāḳh mirī aarā hai
huuñ maiñ vo shāḳh ki hoñ barg-e-tabardam paidā
maiñ jo rotā huuñ mire zaḳhm-e-jigar hañste haiñ
shādī o ġham se kyā hai mujhe tauam paidā
chāhne vaale hazāroñ na.e maujūd hue
ḳhat ne us gul ke kiyā aur hī aalam paidā
dard sar meñ ho kisī ke to mire dil meñ ho dard
vāste mere huā hai ġham-e-ālam paidā
zaḳhm-e-ḳhandāñ haiñ be-ainīh lab-e-ḳhandāñ apne
shādmānī meñ hai yaañ hālat-e-mātam paidā
āsmāñ shauq se talvāroñ kā meñh barsā de
mah-e-nau ne tire abrū kā kiyā ḳham paidā
kaam apnā na huā jab kajī-e-abrū se
gesū-e-yār hue darham-o-barham paidā
shub.h hotā hai sadaf kā mujhe har ġhunche par
kahīñ motī na kareñ qatra-e-shabnam paidā
chup raho duur karo muñh na mirā khulvāo
ġhāfilo zaḳhm-e-zabāñ kā nahīñ marham paidā
qulzum-e-fikr meñ har-chand lagā.e ġhote
durr-e-mazmūñ koī yāroñ se huā kam paidā
dost hī dushman-e-jāñ ho gayā apnā 'ātish'
nosh-e-dāroñ ne kiyā yaañ asar-e-sam paidā