Haidar Ali Aatish

husn kis roz humse saf hua

Haidar Ali Aatish

Faizabad, Uttar pradesh, India

1778-1847

husn kis roz ham se saaf huā

gunah-e-ishq kab muaaf huā

le liyā shukr kar ke saaqī se

dard is meñ huā ki saaf huā

teġh-e-qātil par apnā ḳhuun jam kar

maḳhmal-e-surḳh ġhilāf huā

zahr parhez ho gayā mujh ko

dard darmāñ se almuzāf huā

ḳhāksārī ho chukī me.arāj

siina apnā zamīn-e-sāf huā

kamar-e-yār ne dikhā.ī aañkh

mardum-dīda ḳhāl-e-nāf huā

va.ada jhūTā nakarda mard nahīñ

qaul se fe.al jab ḳhilāf huā

fātiha ko jo vo parī aa.ī

sañg-e-qabr apnā koh-qāf huā

us kamar ke subūt meñ aajiz

fikr kar kar ke mūshigāf huā

riñd-mashrab huuñ mujh ko kyā hove

maz.haboñ meñ jo iḳhtilāf huā

vo dahan huuñ na niklā harf-e-ġhurūr

vo zabāñ huuñ na jis se laaf huā

gird is kūcha ke phirā 'ātish'

haajī se ka.aba tavāf huā

Top Urdushayar.com