hamāre sar har ik ilzām dhar bhī saktā hai

vo mehrbāñ hai ye ehsān kar bhī saktā hai

chaman tū apnī bahāroñ pe itnā naaz na kar

shajar se husn kā zevar utar bhī saktā hai

vo jis ne ziist guzārī hai qaid-e-zulmat meñ

vo ik kiran se ujāle kī Dar bhī saktā hai

kahāñ tak aap lagā.eñge us pe zabt ke bāñdh

kabhī ye āñkhoñ kā dariyā biphar bhī saktā hai

ye ḳhaak o sañg hī kyā sat.h-e-āb par 'shārib'

hamārā naqsh-e-qadam hai ubhar bhī saktā hai