mirī gahrā.iyāñ pal-bhar meñ vo nāyāb kar degā
mujhe vo bāzuoñ meñ legā aur pāyāb kar degā
ajab andāz hai us gul-badan ke pyaar karne kā
mujhe pātāl tak le jā ke mahv-e-ḳhvāb kar degā
vo jab chāhe jise chāhe ġhurūr-e-āshnā.ī de
nazar bhar kar jise dekhegā vo surḳhāb kar degā
sunā hai gul kī ra.anā.ī rahegī jūñ-kī-tūñ lekin
jo sailāb aa.egā ḳhushbū ko zer-e-āb kar degā
'shanāvar' qatra qatra bahtī āñkhoñ kā bhī kuchh socho!
ye aisā rog hai miTTī tirī be-āb kar degā