jahāñ se aa.e the shāyad vahīñ chale ga.e haiñ
vo sāhibān-e-bashārat kahīñ chale ga.e haiñ
zamīñ pe reñgte rahne ko ham jo haiñ maujūd
jo ahl-e-sharm the zer-e-zamīñ chale ga.e haiñ
bahisht hai ki nahīñ hai ye tū hī jāntā hai
tire faqīr ba-nām-e-yaqīñ chale ga.e haiñ
dikhā.ī deñge kabhī vaqt ke jharokoñ se
vo log ab bhī yahīñ haiñ hamīñ chale ga.e haiñ
vahī huā hai jo hotā hai sone vāloñ se
ai mere dil tire pahlū-nashīñ chale ga.e haiñ
hamārī aañkh 'shanāvar' huī hai kyā namnāk
suḳhan-sarāoñ se zehrā-jabīñ chale ga.e haiñ