lamhoñ kā pathrāv hai mujh par sadiyoñ kī yalġhār

maiñ ghar jaltā chhoḌ aayā huuñ dariyā ke us paar

kis kī ruuh ta.āqub meñ hai saa.e ke mānind

aatī hai nazdīk se aksar ḳhushbū kī jhankār

tere sāmne baiThā huuñ ā.ankhoñ meñ ashk liye

mere tere biich ho jaise shīshe kī dīvār

mere bāhar utnī hī marbūt hai be-rabtī

mere andar kī duniyā hai jitnī pur-asrār

band ā.ankhoñ meñ kaañp rahe haiñ jugnū jugnū ḳhvāb

sar par jhuul rahī hai kaisī nādīda talvār