vo huā hī nahīñ jo sochā thā

merā ho kar bhī kab vo merā thā

vo tasavvur ke jaal meñ uljhā

dhuñdh sā ik udaas chehra thā

har ghaḌī us ke ghar kā darvāza

merī ḳhātir khulā hī rahtā thā

chhīn lī us ne merī bīnā.ī

maiñ ne ik ḳhvāb hī to dekhā thā

us ko bhī lag ga.ī ḳhizāñ kī nazar

shāḳh par āḳhirī jo patta thā

ratjage kī thakī thakī āñkheñ

sochtī huuñ vo kitnā tanhā thā

ek bargad kā peḌ thā us par

ek aaseb thā jo laTkā thā