tā hashr rahe ye daaġh dil kā
yā-rab na bujhe charāġh dil kā
ham se bhī tunak-mizāj hai ye
paate hī nahīñ dimāġh dil kā
yaañ ātish-e-ishq se shab o roz
dahke hai paḌā ayāġh dil kā
us rashk-e-chaman kī yaad meñ hai
shādāb hamesha baaġh dil kā
jiine kā mazā usī ko hai bas
jis shaḳhs ko ho farāġh dil kā
hai bāda-e-ġham se tere din raat
labrez yahāñ ayāġh dil kā
ma.alūm nahīñ kisī ko 'rañgīñ'
de kaun hameñ surāġh dil kā