hairat-e-jalva muqaddar hai to jalva kyā hai
tujh se vābasta hai dil varna tamāshā kyā hai
koī din aur ġham-e-hijr meñ shādāñ ho leñ
abhī kuchh din meñ samajh jā.eñge duniyā kyā hai
dil to ik aur hī āhañg pe hai raqs-kunāñ
dil kā is umr-e-faromāya se rishta kyā hai
ham use bhuul chuke haiñ magar ai daur-e-hayāt
sāmne ā.ankhoñ ke ye sūrat-e-zebā kyā hai
jiine vāloñ se kaho koī tamannā DhūñDeñ
ham to āsūda-e-manzil haiñ hamārā kyā hai