bas rañj kī hai dāstāñ unvān hazāroñ

jiine ke liye mar ga.e insān hazāroñ

vo jis ne mirī ruuh ko dard-āshnā rakkhā

haiñ mujh pe usī zaḳhm ke ehsān hazāroñ

jis ḳhaak se kahte ho vafā ham nahīñ karte

so.e haiñ usī ḳhaak meñ sultān hazāroñ

ik rasm-e-takabbur hai so is daur ke insāñ

jeboñ meñ liye phirte haiñ pahchān hazāroñ

lāzim hai masāfat meñ bhaTak jaanā hamārā

ham tanhā musāfir ke haiñ sāmān hazāroñ

ab hai faqat andesha-e-hālāt mayassar

ham dil meñ kabhī rakhte the armān hazāroñ

ye shahr-e-suḳhan hai yahāñ har moḌ pe 'az.har'

hoshiyār bane baiThe haiñ nādān hazāroñ