tū nahīñ hai to mirī shaam akelī chup hai

yaad meñ dil kī ye vīrān havelī chup hai

har taraf thī baḌī mahkār mere āñgan meñ

apne phūloñ ke liye merī chamelī chup hai

bolte haath bhī ḳhāmosh hue baiThe haiñ

ik muqaddar kī tarah merī hathelī chup hai

bhed khultā hī nahīñ kaisī udāsī chhā.ī

buujh saktā nahīñ koī vo pahelī chup hai

itnā hañstī thī ki aañsū nikal aate the 'sabā'

ye na.ī baat bahāroñ kī sahelī chup hai