ye tīra-baḳht bayānoñ meñ qaid rahte haiñ
vatan hamāre tarānoñ meñ qaid rahte haiñ
ḳhudī se duur rag-e-hā-e-sañg meñ sākit
mire yaqīn gumānoñ meñ qaid rahte haiñ
saḌak pe ḳhvāhisheñ be-nām-o-nañg phirtī haiñ
zamīñ ke ḳhvāb zamānoñ meñ qaid rahte haiñ
kahā falak ne ye uḌte hue parindoñ se
zamīñ pe log makānoñ meñ qaid rahte haiñ
mire ḳhudā ne kahā hai ki har jagah hai vo
tire ḳhudā to fasānoñ meñ qaid rahte haiñ