hasad kī aag thī aur daaġh daaġh siina thā
diloñ se dhul na sakā vo ġhubār-e-kīna thā
zarā sī Thes lagī thī ki chuur chuur huā
tire ḳhayāl kā paikar bhī ābgīna thā
ravāñ thī koī talab sī lahū ke dariyā meñ
ki mauj mauj bhañvar umr kā safīna thā
vo jāntā thā magar phir bhī be-ḳhabar hī rahā
ajiib taur thā us kā ajab qarīna thā
bahut qarīb se guzre magar ḳhabar na huī
ki ujḌe shahr kī dīvār meñ dafīna thā