ye kyā huā tumheñ lafzoñ se maat khāne lage
savāl ham ne kiyā aur nazar jhukāne lage
safar meñ hausla darkār hai har ik sūrat
ye kyā ki chār-qadam par hī Dagmagāne lage
abhī to ghar mirā puurī tarah jalā bhī nahīñ
jo haath señk rahe the vo uTh ke jaane lage
jab un se fāsla ham ne baḌhāyā to ye huā
vo duur hote hue bhī qarīb aane lage
abhī to un se shanāsā.ī bhī nahīñ merī
abhī se log idhar kī udhar uḌāne lage