jo kuchh nazar paḌā mirā dekhā huā lagā

ye jism kā libās bhī pahnā huā lagā

jo sher bhī kahā vo purānā lagā mujhe

jis lafz ko chhuā vahī bartā huā lagā

dil kā nagar to der se vīrān thā magar

sūraj kā shahr bhī mujhe ujḌā huā lagā

apnā bhī jī udaas thā mausam ko dekh kar

is shoḳh kā mizāj bhī badlā huā lagā

'pāshī' se khul ke baat hamārī bhī kal huī

vo naujavān to hameñ suljhā huā lagā