vahshat meñ nikal aayā huuñ idrāk se aage

ab DhūñDh mujhe majma-e-ushshāq se aage

ik surḳh samundar meñ tirā zikr bahut hai

ai shaḳhs guzar dīda-e-namnāk se aage

us paar se aatā koī dekhūñ to ye pūchhūñ

aflāk se pīchhe huuñ ki aflāk se aage

dam toḌ na de ab kahīñ ḳhvāhish kī havā bhī

ye ḳhaak to uḌtī nahīñ ḳhāshāk se aage

jo naqsh ubhāre the miTā.e bhī haiñ us ne

darpesh phir ik chaak hai is chaak se aage

ā.īne ko toḌā hai to mālūm huā hai

guzrā huuñ kisī dasht-e-ḳhatarnāk se aage

ham-zād kī sūrat hai mire yaar kī sūrat

maiñ kaise nikal saktā huuñ chālāk se aage