maiñ apnī aañkh ko us kā jahān de duuñ kyā
zamīn khīñch luuñ aur āsmān de duuñ kyā
maiñ duniyā zaad nahīñ huuñ mujhe nahīñ manzūr
makān le ke tumheñ lā-makān de duuñ kyā
ki ek roz khulā rah gayā thā ā.īna
agar gavāh banūñ to bayān de duuñ kyā
uḌe kuchh aise ki merā nishān tak na rahe
maiñ apnī ḳhaak ko itnī uḌaan de duuñ kyā
ye lag rahā hai ki nā-ḳhush ho dostī meñ tum
tumhāre haath meñ tiir o kamān de duuñ kyā
samajh nahīñ rahe be-rañg āñsuoñ kā kahā
unheñ maiñ surḳh-lahū kī zabān de duuñ kyā
sunā hai zindagī koī tah-e-samundar hai
bhañvar ke haath meñ ye bādbān de duuñ kyā
ye faisla mujhe karnā hai ThanDe dil se 'razā'
nahīñ badaltā zamāna to jaan de duuñ kyā