rote rote os bolī merā chehra dekh kar

tum batāo kyā milā hai ḳhvāb us kā dekh kar

ik shikārī kā vo bachcha haa.e vo nanhā sā phuul

maiñ qafas meñ lauT aayā dasht saarā dekh kar

intihā.ī dhuup se bhī ik qadam aage kī dhuup

aah ye bhī bujh rahī hai merā saayā dekh kar

Thaharnā to zaat kā thā us pe ye bechain jism

chāñd taare ro paḌe haiñ bahtā dariyā dekh kar

dūsrī duniyā se bachne ke liye piite haiñ ham

ham bahut uktā ga.e haiñ ek duniyā dekh kar