rishtoñ ko jab dhuup dikhā.ī jaatī hai
cigarette se cigarette sulgā.ī jaatī hai
jism hamārā ik aisī mil hai jis meñ
añdhiyāroñ se dhuup banā.ī jaatī hai
nā se us kī shakl milāne lagtā huuñ
jab us kī āvāz sunā.ī jaatī hai
kyā vo panne sach-much kore hote haiñ
jin par koī zarb lagā.ī jaatī hai
bulle-bābā dīvāno ko samjhāo
apnī hastī kaam meñ laa.ī jaatī hai
apnī miTTī apnā paanī vāpas le
sunte haiñ ye shai lauTā.ī jaatī hai
patthar le kar aate haiñ sab siine meñ
bhaag jage to Thokar khaa.ī jaatī hai
ḳhāmoshī se yakjā karte haiñ ḳhud ko
shor machā kar aag bujhā.ī jaatī hai
hote hote raushan hotā hai chehra
jaate jaate dil se koī jaatī hai
donoñ bhavoñ kī shikneñ haath baTātī haiñ
apnī tezī aañkh banā.ī jaatī hai