har aan jalva na.ī aan se hai aane kā
chalan ye chalte ho āshiq kī jaan jaane kā
qasam qadam kī tire jab talak hai dam meñ dam
maiñ paañv par se tire sar nahīñ uThāne kā
hamārī jaan pe girtī hai barq-e-ġham zālim
tujhe to sahl sā hai shaġhl muskurāne kā
qasam ḳhudā kī maiñ kuchh khā ke so rahūñgā sanam
jo saath apne nahīñ mujh ko tū sulāne kā
nasīb us ke sharāb-e-bahisht hove mudām
huā hai jo koī mūjid sharāb-ḳhāne kā
bahut se ḳhūn-ḳharābe macheñge ḳhāna-ḳharāb
yahī hai rañg agar tere paan khāne kā
hamārī chhātī pe phirtā hai saañp yaañ 'ehsāñ'
vahāñ hai shaġhl use zulf ke banāne kā