sham.eñ raushan haiñ ābgīnoñ meñ
dāġh-e-dil jal rahe haiñ sīnoñ meñ
phir kahīñ bandagī kā naam aayā
phir shikan paḌ ga.ī jabīnoñ meñ
le ke tesha uThā hai phir mazdūr
Dhal rahe haiñ jabal mashīnoñ meñ
zehn meñ inqilāb aate hī
jaan sī paḌ ga.ī dafīnoñ meñ
baat karte haiñ ġham-nasīboñ kī
aur baiThe haiñ shah-nashīnoñ meñ
jin ko girdāb kī ḳhabar hī nahīñ
kaise ye log haiñ safīnoñ meñ
ham-safīro chaman ko batlā do
saañp baiThe haiñ āstīnoñ meñ
ham na kahte the shā.irī hai vabāl
aaj lo ghir ga.e hasīnoñ meñ