naujavāñ log pajāme ko burā kahte haiñ

painT phaT jaa.e to qismat kā likhā kahte haiñ

apne ash.ār meñ jum.a ko jumā kahte haiñ

aise ustād ko faḳhrushshuarā kahte haiñ

nazm ko gift rubā.ī ko atā kahte haiñ

sher vo ḳhud nahīñ kahte haiñ chachā kahte haiñ

i-m-f ko samajhte haiñ ma.īshat kā ilaaj

log al-kuhl ko khāñsī kī davā kahte haiñ

ye to chaltī nahīñ p-m kī ijāzat ke baġhair

is ko aivān-e-sadārat kī havā kahte haiñ

jaane kab is meñ hameñ aag lagānī paḌ jaa.e

ham siyāsat ke janāze ko chitā kahte haiñ

jab se bachchoñ ko pasand aa.ī haiñ hindī filmeñ

mujh ko abbā nahīñ kahte vo pitā kahte haiñ

merī baarī pe hukūmat hī badal jaatī hai

ab vazārat ko ġhubāre kī havā kahte haiñ

load-shedding kī shikāyat pe dolattī maare

log bijlī ke minister ko gadhā kahte haiñ

bhuuk taḳhlīq kā talent baḌhā detī hai

peT ḳhālī ho to ham sher nayā kahte haiñ