duā ke haath meñ ḳhanjar baḌā ajiib lagā
badalte vaqt kā manzar baḌā ajiib lagā
lahū vafāoñ kā pī kar bhī na huā gulzār
siyāsatoñ kā ye banjar baḌā ajiib lagā
zamīñ se roTī ugāne hī vaale haiñ bhūke
ye mehnatoñ kā muqaddar baḌā ajiib lagā
maiñ aa.ina thā zamāne ke hādsoñ kā hī
usī ne dekhā jo hañs kar baḌā ajiib lagā
huā hai kyā ki ujāloñ se Dar rahe haiñ log
tumhāre shahr kā ghar ghar baḌā ajiib lagā
gunāhoñ ke hī gale meñ ināyatoñ kā haar
adālatoñ kā ye zevar baḌā ajiib lagā
luTī-luTī sī hai rāheñ miTī-miTī manzil
safar ye umr kā aksar baḌā ajiib lagā