āshiq na agar vafā karegā

phir aur kaho to kyā karegā

mat toḌiyo dil sanam kisī kā

allāh tirā bhalā karegā

hai ālam-e-ḳhvāb hāl-e-duniyā

dekhegā jo chashm vā karegā

jiitā na bachegā koī zālim

aisī hī jo tū adā karegā

kal ke to ka.ī paḌe haiñ zaḳhmī

kyā jāniye aaj kyā karegā

aa jā.egā sāmne tū jis ke

dil kyā hai ki jī fidā karegā

kyā jāniye kyā karegā tūfāñ

gar ashk yūñhī bahā karegā

'bedār' ye bait-e-dard ro ro

furqat meñ tirī paḌhā karegā

''apnī āñkhoñ meñ tujh ko dekhūñ

aisā bhī kabhū ḳhudā karegā''