mai piye mast hai sarshār kahāñ jaatā hai
is shab-e-tār meñ ai yaar kahāñ jaatā hai
teġh-bar-dosh sipar haath meñ dāman-gardāñ
ye banā sūrat-e-ḳhuñḳhār kahāñ jaatā hai
dil ko ārām nahīñ ek bhī dam yaañ tujh bin
tū mire paas se dildār kahāñ jaatā hai
ek aalam abhī hairat-zada kar aayā tū
phir ab ai ā.īna-ruḳhsār kahāñ jaatā hai
jām-o-mīnā-o-mai-o-sāqī-o-mutrib ham-rāh
is sar-anjām se 'bedār' kahāñ jaatā hai