dil jo tesha-zanī pe maa.il hai

kuchh na kuchh rāste meñ haa.il hai

tū jo hairat-zada nahīñ hotā

tū mirī guftugū kā qaa.il hai

maiñ musāfir huuñ kohna rasmoñ kī

mere aage rah-e-qabā.il hai

kyā sunā.ūñ maiñ hāl-e-dil ki ye dil

terī kaj-fahmiyoñ se ghāyal hai

raqs kartā hai harf harf mirā

mere lahje meñ kaun paa.il hai

mere pairoñ ko Dasne vaalā saañp

merī gardan meñ kyuuñ hamā.il hai