har ġhazal har sher apnā isti.āra-āshnā
fasl-e-gul meñ jaise shāḳh-e-gul sharārā-āshnā
ḳhuun thūkā dil jalāyā naqd-e-jāñ qurbān kī
shahr-e-fan meñ maiñ rahā kitnā ḳhasārā-āshnā
kah gayā apnī nazar se an-kahe qisse bhī vo
bazm-e-harf-o-saut meñ jo thā ishārā-āshnā
apne TuuTe shahparoñ ke nauhagar to the bahut
dasht-e-fan meñ thā na koī sañg-e-ḳhārā-āshnā
umr bhar biphrī huī maujoñ se jo laḌtā rahā
vo samundar to azal se thā kinārā-āshnā