rabt meñ pahlū-e-nairañg kahāñ se aayā

sāhab-e-arz ko ye Dhañg kahāñ se aayā

ḳhushnumā aks hue ḳhaar kī sūrat kaise

aa.ine sab the to phir sañg kahāñ se aayā

gard kī zad meñ hai ḳhushbū se mahaktā āñgan

ḳhvāb meñ dahr kā āhañg kahāñ se aayā

sabz hai vādī-e-be-āb meñ gulshan merā

shab kī tasvīr meñ ye rañg kahāñ se aayā

dost dushman haiñ sabhī vaz.a pe qaa.em 'rāhat'

kyā kahūñ jiit ke maiñ jañg kahāñ se aayā