tujhe hai shauq-e-zabāñ par jo qand rakhne kā

de iḳhtiyār mujhe bhī pasand rakhne kā

pukārtī haiñ mire dil kī pastiyāñ mujh ko

yahī to vaqt hai rutba buland rakhne kā

isī jihād meñ guzrī hai zindagī apnī

kiyā hai roz irāda samand rakhne kā

buland meḳh se ḳhvāboñ kī rassiyāñ bāñdho

diyā hai raat ne mauqa kamand rakhne kā

hamīñ se husn ko hai aas daad paane kī

hamīñ ko hukm hai āñkhoñ ko band rakhne kā

sabhī ġhamoñ kā uThātā huuñ ḳharch meñ 'rāhat'

ajab sila hai dil-e-dard-mañd rakhne kā