chāñd sitāroñ se kyā pūchhūñ kab din mere phirte haiñ
vo to bichāre ḳhud haiñ bhikārī Dere Dere phirte haiñ
jin galiyoñ meñ ham ne sukh kī sej pe rāteñ kaaTī thiiñ
un galiyoñ meñ byākul ho kar sāñjh savere phirte haiñ
rūp-sarūp kī jot jagānā us nagrī meñ jokham hai
chāroñ khūñT bagūle ban kar ghor añdhere phirte haiñ
jin ke shyām-baran saa.e meñ merā man sustāyā thā
ab tak āñkhoñ ke aage vo baal ghanere phirte haiñ
koī hameñ bhī ye samjhā do un par dil kyuuñ riijh gayā
dekhī chitvan bāñkī chhab vaale bahtere phirte haiñ
ik din us ne nain milā ke sharmā ke mukh moḌā thā
tab se sundar sundar sapne man ko ghere phirte haiñ
us nagrī ke baaġh aur man kī yaaro lailā nyārī hai
panchhī apne sar pe uThā kar apne basere phirte haiñ
log to dāman sī lete haiñ jaise ho jī lete haiñ
'ābid' ham dīvāne haiñ jo baal bikhere phirte haiñ