hai sadaf gauhar se ḳhālī raushnī kyūñkar mile
aaj shāyad rāste meñ koī paiġhambar mile
kaisī rut aa.ī ki saarā baaġh dushman ho gayā
shāḳh-e-gul meñ bhī hameñ talvār ke jauhar mile
duur tak jin rāstoñ par muntazir baiThe the log
lauT kar bād-e-sabā aa.ī to kuchh patthar mile
raushnī kī khoj meñ paltīñ zamīñ kī jab taheñ
kuchh lahū ke daaġh kuchh TuuTe hue ḳhanjar mile
āḳhir ab aisā bhī kyā duniyā se bad-dil honā 'zeb'
pahle miTTī meñ to mere yaar ye jauhar mile